Category: 2021 – 2024

Posted on

Stofudrama af bestu gerð

            Í gærkvöldi fór ég og sá kvikmyndina/leikritið Skylight eftir David Hare, en myndin er sýnd í Bíó Paradís. Orðið skylight merkir ýmist þakgluggi, ljóri, eða lýsing af himni ofan, himinskin, birta að ofan. Höfundur leikritsins, David Hare, f. 1947, er eitt frægasta leikskáld Breta, en einnig kvikmyndahandritshöfundur og leikstjóri bæði kvikmynda og í leikhúsi. Leikritið var fyrst sýnt árið 1995 og þá léku þau Michael Gambon og Lia Williams aðalhlutverkin. Leikritið var svo sýnt hjá Leikfélagi Reykjavíkur árið 1998 undir nafninu Ofanljós. Leikendur voru þau Þorsteinn Gunnarsson, Guðlaug Elísabet Ólafsdóttir og Friðrik Friðriksson. Kristín Jóhannesdóttir var leikstjóri en Árni Ibsen þýddi verkið.

            Í gærkvöldi sá ég kvikmyndaða uppfærslu National Theatre Live á leikritinu. Aðalhlutverk voru í höndum Carey Mulligan og Bill Nighy, en þriðja hlutverkið var í höndum Matthew Beard. Leikstjórar voru Stephen Daldry og Robin Lough, en ég reikna með að sá síðarnefndi hafi stýrt kvikmyndalegri hlið málsins, þar sem Daldry var sá leikstjóri sem setti verkið upp í leikhúsinu sjálfu.

[Skjáskot af plakati leikhúsuppfærslunnar 2014.]

Lesa meira
Posted on

Eyðsluklóarinnar Gríms Thomsens minnst á Álftanesi*

Nú á dögunum fór ég í bíltúr út á Álftanes. Þau Már Jónsson og mamma hans Helgu Kress höfðu boðið mér að koma með. Helga var bílstjórinn. Tilefnið var að Már átti að flytja fyrirlestur um Grím Thomsen. Fyrirlesturinn var haldinn þann 18. nóvember sl. Hann var fluttur í íþróttasal í íþróttahúsi sem er tengt sundlauginni frægu sem byggð var á Hrunárunum. Félag áhugamanna um sögu Bessastaðaskóla stóð fyrir þessum atburði. Vilhjálmur Bjarnason fyrrv. þingmaður er formaður þess félags. Í fyrirlestrinum sagði Már frá námsárum Gríms, sem voru mjög kostnaðarsöm fyrir foreldra hans, Þorgrím og Ingibjörgu. Þorgrímur og Ingibjörg áttu heima á Bessastöðum en Þorgrímur var ráðsmaður þar en einnig gullsmiður. Sem betur fór búnaðist þeim hjónum vel.

Lesa meira
Posted on

Fallin lauf eftir Aki Kaurismäki

Fallin lauf, nýja myndin eftir Aki Kaurismäki sem nú er sýnd í Bíó Paradís, er alveg bráðfín. Myndin var frumsýnd nú í ár. Hún heitir Kuolleet lehdet á frummálinu og er kölluð Fallen leaves á alþjóðamálinu. Ég er ekki hissa á að þessi mynd hafi fengið mörg verðlaun. Hún fjallar aðallega um þunglyndan og drykkfelldan málmiðnaðarmann í Helsinki sem heitir Holappa og búðarkonuna Önsu (Ansa). Þau missa bæði vinnuna í myndinni og þurfa að takast á við ýmsa erfiðleika.

Lesa meira
Posted on

Stjórnun á líkamsþyngd

            Margt fólk á við ofþyngdarvanda að etja. Til viðbótar við það líkamlega erfiði sem fylgir ofþyngd hefur feitt fólk oft þungar áhyggjur af holdafarinu og þeim áhrifum sem spikið hefur á heilsufarið. Feitt fólk ber því ekki aðeins þungar byrðir af spiki með sér alla daga heldur einnig blýþungar sálrænar byrðar, nefnilega alla óánægjuna og skömmina sem getur fylgt hinum bersýnilega líkamsþunga. Þar til viðbótar býr feitlagið fólk í mörgum tilvikum við fordóma samferðafólks síns, svo mikla fordóma til dæmis að vinnuframlag feitlagins fólks er gjarna minna metið en vinnuframlag grannvaxins fólks.[1] Þá má ekki gleyma því að lífslíkur feitlagins fólks og ævilengd er áreiðanlega töluvert minni en þeirra sem grennri eru, til dæmis vegna sykursýki, hjartasjúkdóma og tengdra sjúkdóma. Ég ákvað að skrifa þessa grein handa vinum mínum og kunningjum sem eiga við þennan vanda að etja og ég vona að hún geti komið þeim að einhverju gagni.

            Baðvogin sem ég keypti í lok janúar 2021.

Lesa meira